Ken se tototl eli kuesoli
patlantikisa iuan motlalia ipan noyolo.
Noijtik mochanchiua
Nopayoj uika, kiolinijtikaj iakoko,
kinijtotia ipilikxiuaj.
Kostik piltototsij, san pitsaktsij
nelyejyektsij uika,
nelyejyektsij itlachialis.
Motlalis ipan noikxopil
ajkotlachia iuan achi chikauak nechtlaluilia iuikalis.
Uankinoj noijtik kueponi xochitsitsij
iuan noixtiyol ameya
noixtiyol xochiameya.
Sejse xochitsitsij peuaj uetsij, uetsij, uetsij
momana ipan nonakayo.
Peua nimotlakayopoloa iijtik tlali
xochimej amo tlamij kisaj, kisaj, kisaj,
nechkualchiua tlen ijtlakajtok ipan notlakayo.
Tototsij nojua nechtlaluilia iuikalis
nojua nechita.
Kemaj kuesoltototsij nechpaxaloa
Na san nijkaki, san niyolyamania,
san nimotlalpachoa iijtik tlali,
san niixtiyolxochiameya.
Kemaj onsioui tototsij, uankinoj
patlani uejka
iuan nechkajteua nixochikuepontok
nechkajteua nixochikuepontok yane tototsij.
Eneida Hernández
“Neijmantototsintle” tlen Ateri Miyawatl, ika nauatlajtoli tlen Huasteca Veracruzana
Comments